RECP پاکستان نے خدمت گروپ کے اشتراک سے راولپنڈی کے علاقے گلشن آباد، اڈیالہ روڈ میں شجرکاری مہم کا انعقاد کیا، جس کے تحت مقامی شہریوں میں پودے تقسیم کیے گئے تاکہ وہ اپنے گھروں، گلیوں اور محلوں میں درخت لگا سکیں۔
اس مہم کا مقصد علاقے میں سرسبز رقبہ بڑھانا، ماحولیاتی آلودگی میں کمی لانا اور عوام میں درخت لگانے کی اہمیت سے متعلق شعور اجاگر کرنا تھا۔ اس موقع پر شہریوں نے بھرپور شرکت کی اور ماحول دوست اقدام کو سراہا۔
تقریب سے خطاب کرتے ہوئے RECP پاکستان کے چیف ایگزیکٹو آفیسر محمد ارشاد رمای نے کہا کہ گزشتہ 15 سالوں سے مسلسل شجرکاری کے باعث گلشن آباد کا درجہ حرارت ملحقہ اڈیالہ روڈ کے مقابلے میں 2 سے 3 ڈگری کم ہے، جو درختوں کے مثبت ماحولیاتی اثرات کا واضح ثبوت ہے۔
انہوں نے کہا کہ درخت نہ صرف درجہ حرارت کم کرتے ہیں بلکہ کاربن ڈائی آکسائیڈ جذب کرکے فضا کو صاف بناتے ہیں، آلودگی کم کرتے ہیں اور قدرتی ماحول کو بہتر بناتے ہیں۔
محمد ارشاد رمای نے اس عزم کا اعادہ کیا کہ RECP پاکستان ملک بھر میں شجرکاری اور ماحولیاتی تحفظ کے اقدامات جاری رکھے گا۔ انہوں نے خدمت گروپ اور مقامی شہریوں کے تعاون کو سراہتے ہوئے عوام سے اپیل کی کہ وہ زیادہ سے زیادہ درخت لگائیں اور ان کی حفاظت کو قومی ذمہ داری سمجھیں۔
