فاطمہ جناح ویمن یونیورسٹی، راولپنڈی میں پاکستان کا 79واں یومِ آزادی ملی جذبے، اتحاد، تخلیقی صلاحیتوں اور طلبہ کی غیر معمولی صلاحیتوں کے بھرپور اظہار کے ساتھ جوش و خروش سے منایا گیا۔ یومِ آزادی کی یہ پروقار تقریب آفس آف اسٹوڈنٹ افیئرز کے زیرِ اہتمام منعقد ہوئی ۔
یومِ آزادی کی تقریبات کے سلسلے میں مختلف مقابلوں کا انعقاد کیا گیا، جن میں تقریری مقابلہ، مقابلہ شعر و شاعری، ملی نغمہ، پوسٹر سازی اور ’’میڈ اِن پاکستان‘‘ پروٹوٹائپ کے مقابلے شامل تھے۔ ان مقابلوں میں نمایاں کارکردگی کا مظاہرہ کرنے والے طلبہ و طالبات نے اپنی صلاحیتوں کا اظہار کیا، جبکہ پوزیشن حاصل کرنے والے شرکاء میں اسناد بھی تقسیم کی گئیں۔ اس موقع پر یونیورسٹی میں جاری مینٹورنگ پروگرام کے شرکاء میں اسناد بھی تقسیم کی گئ۔
تقریبات کا باقاعدہ آغاز پرچم کشائی اور شجرکاری کی تقریب سے ہوا، جس کی قیادت وائس چانسلر، پروفیسر ڈاکٹر بشریٰ مرزا (تمغہ حسن کارکردگی، تمغہ امتیاز) نے کی۔ پرچم کشائی کے بعد ثقافتی پروگرام پیش کیا گیا، جس میں طلبہ نے اپنی صلاحیتوں کا بھرپور مظاہرہ کیا۔ بعد ازاں وائس چانسلر نے اپنے فکر انگیز خطاب میں یومِ آزادی کی اہمیت اور قومی ذمہ داریوں پر روشنی ڈالی۔
اپنے خطاب میں وائس چانسلر نے اس بات پر زور دیا کہ ’’آزادی ایک نعمت بھی ہے اور ایک ذمہ داری بھی۔‘‘ انہوں نے کہا کہ پاکستان کی پہلی جامعہ برائے خواتین ہونے کی حیثیت سے فاطمہ جناح ویمن یونیورسٹی خواتین کو بااختیار بنانے، ان کی صلاحیتوں کو نکھارنے اور انہیں ملک و قوم کی تعمیر و ترقی میں مؤثر کردار ادا کرنے کے قابل بنانے کے عزم پر کاربند ہے۔ انہوں نے اس عزم کا اعادہ کیا کہ فاطمہ جناح ویمن یونیورسٹی ایک مضبوط، ترقی یافتہ اور خوشحال پاکستان کی تشکیل میں اپنا بھرپور کردار ادا کرتی رہے گی۔
تقریب میں تحسین فواد، رکن پنجاب اسمبلی و رکن سنڈیکیٹ نے بطور معزز مہمان شرکت کی۔ اس کے علاوہ پرو وائس چانسلر، ڈینز، چیئرپرسنز، اساتذہ، افسران و ملازمین، طلبہ اور بچوں کی بھرپور شرکت نے تقریب کو مزید پُررونق، خوشگوار اور یادگار بنا دیا۔
تقریب کا اختتام کیک کاٹنے کے ساتھ ہوا۔ اس موقع پر یونیورسٹی کی تمام طلبہ سوسائٹیز کی کاوشوں کو بھی خراجِ تحسین پیش کیا گیا، جنہوں نے اپنی محنت، تخلیقی صلاحیتوں، باہمی تعاون اور ٹیم ورک کے ذریعے یومِ آزادی کی تقریبات کو کامیاب اور یادگار بنانے میں اہم کردار ادا کیا۔
پروگرام کے اختتام پر پاکستان کی مسلح افواج کی سلامتی، ملک میں امن و استحکام، قومی ترقی و خوشحالی اور دنیا بھر میں مشکلات کا سامنا کرنے والے افراد کے لیے ہمدردی، آسانی اور بہتری کی خصوصی دعا کی گئی۔
پاکستان ہمیشہ زندہ باد!
