راولپنڈی کے ہولی فیملی ہسپتال کے برن یونٹ میں وزیراعلیٰ پنجاب مریم نواز شریف کے شروع کردہ ’نئی زندگی پروگرام‘ کے تحت کارنر ڈیسک کا افتتاح کر دیا گیا۔ افتتاح پنجاب سوشل پروٹیکشن اتھارٹی کی وائس چیئرپرسن جہاں آرا منظور وٹو نے کیا۔
پروگرام کے تحت تیزاب گردی سے متاثرہ افراد کو مفت علاج، سرجری اور پیوند کاری کی سہولیات فراہم کی جائیں گی، جبکہ متاثرین اور ان کے خاندانوں کو قانونی اور مالی معاونت بھی دی جائے گی۔
اس موقع پر جہاں آرا منظور وٹو نے کہا کہ پنجاب کے سات برن یونٹس میں ’نئی زندگی‘ کے کارنر ڈیسک قائم کرکے فعال کر دیے گئے ہیں۔ وزیراعلیٰ پنجاب کے وژن کے مطابق ان مراکز کا مقصد تیزاب گردی کے متاثرین کو بہتر اور بروقت طبی سہولیات فراہم کرنا ہے۔
انہوں نے کہا کہ یہ اپنی نوعیت کا منفرد پروگرام ہے اور دیگر صوبوں سے تعلق رکھنے والے متاثرین بھی اس سہولت سے استفادہ کر سکتے ہیں۔
ہولی فیملی ہسپتال کے ایم ایس ڈاکٹر اعجاز بٹ کے مطابق اس وقت برن یونٹ میں تیزاب سے متاثرہ دو مریض زیر علاج ہیں اور انہیں تمام ضروری طبی سہولیات فراہم کی جا رہی ہیں۔
انہوں نے کہا کہ تیزاب گردی کے نتیجے میں بالخصوص خواتین کے چہرے اور جسم پر گہرے زخم آتے ہیں، جن کے علاج کیلئے کئی مرتبہ سرجری کی ضرورت پڑ سکتی ہے۔ نئی زندگی پروگرام سے ایسے متاثرین کو علاج اور بحالی کی بہتر سہولیات میسر آئیں گی۔
