ایران و پاکستان سے واپس آنے والی افغان خواتین بدترین بحران کا شکار: اقوام متحدہ

اقوام متحدہ
اقوام متحدہ کی زیر قیادت ایک نئی رپورٹ کے مطابق، ایران اور پاکستان سے افغانستان واپس جانے والی افغان خواتین شدید مشکلات، عدم تحفظ اور انسانی بحران کا سامنا کر رہی ہیں۔

ستمبر 2023 سے اب تک ایران اور پاکستان سے 24 لاکھ سے زائد غیر دستاویزی افغان مہاجرین واپس لوٹ چکے ہیں۔ ان میں سے تقریباً آدھی تعداد خواتین اور بچیوں پر مشتمل ہے، جبکہ ایران سے واپس آنے والوں میں یہ تناسب جون میں بڑھ کر 30 فیصد تک پہنچ چکا ہے۔

"جینڈر اِن ہیومینیٹیرین ایکشن ورکنگ گروپ” (UN Women اور اقوام متحدہ کی تولیدی صحت ایجنسی UNFPA کی سربراہی میں) کی رپورٹ کے مطابق، واپسی کی یہ بڑھتی ہوئی لہر افغانستان کے پہلے سے کمزور انسانی امدادی نظام پر شدید دباؤ ڈال رہی ہے، جس کا سب سے بڑا بوجھ خواتین اور بچیوں کو اٹھانا پڑ رہا ہے۔

مہرم (مرد سرپرست) کے بغیر سفر کرنے والی خواتین کو خاص طور پر خطرات لاحق ہیں۔ بارڈر پر لی گئی انٹرویوز اور مشاورت میں رشوت، ہراسانی، اور تشدد کی دھمکیوں کی اطلاعات سامنے آئی ہیں۔

واپسی کے بعد خواتین کو صنفی بنیادوں پر تشدد، کم عمری کی شادی، جبری شادیاں، انسانی اسمگلنگ اور زندہ رہنے کے لیے جنسی سودے بازی جیسے سنگین خطرات کا سامنا ہے۔ ایک امدادی کارکن نے قندھار سے بتایا:

“ایک بیوہ عورت، جس کی چار بیٹیاں تھیں، یہ دیکھنے کی کوشش کر رہی تھی کہ کیا وہ اپنی ایک یا دو بیٹیوں کو فروخت کر سکتی ہے تاکہ باقی خاندان کو بچایا جا سکے۔”

بارڈر پر خواتین کے لیے محفوظ مقامات اور ذہنی و نفسیاتی مدد کی سہولیات (MHPSS) کی شدید قلت ہے۔ اکثر خواتین مایوس، ذہنی دباؤ میں مبتلا اور الجھن کا شکار ہوتی ہیں۔

افغانستان کے مختلف صوبوں میں خواتین نے رہائش، روزگار اور بچیوں کی تعلیم کو اپنی اہم ترین ضروریات قرار دیا ہے۔

رپورٹ کے مطابق:

• صرف 10 فیصد خواتین سربراہ گھرانے مستقل رہائش میں رہتی ہیں۔

• 40 فیصد کو بے دخلی کا خوف ہے۔

• ہرات میں 71 فیصد خواتین نے کرائے کے جھگڑوں اور 45 فیصد نے غیر موزوں رہائش کی شکایت کی۔

کئی خواتین، جو پہلے سِلائی، کشیدہ کاری یا دیگر دستکاریوں میں کام کرتی تھیں، اب وسائل کی کمی، نقل و حرکت پر پابندی اور دستاویزات کی عدم دستیابی کے باعث کام دوبارہ شروع کرنے سے قاصر ہیں۔

اقوام متحدہ کی خواتین تنظیم اور اس کے شراکت دار ادارے عالمی برادری سے ہنگامی فنڈنگ اور طویل المدتی مدد کا مطالبہ کر رہے ہیں تاکہ افغان خواتین کی فوری اور دیرپا ضروریات پوری کی جا سکیں۔