پاک چین دوستی وقت کی کسوٹی پر پوری اتری ہے: فیلڈ مارشل عاصم منیر

راولپنڈی: چیف آف آرمی اسٹاف فیلڈ مارشل سید عاصم منیر نے کہا ہے کہ پاک چین دوستی وقت کی کسوٹی پر پوری اتری ہے، دونوں ممالک کے تعلقات باہمی اعتماد، غیر متزلزل حمایت اور مشترکہ عزم کی بنیاد پر قائم ہیں۔

یہ بات انہوں نے چین کی پیپلز لبریشن آرمی (PLA) کے 98ویں یومِ تاسیس کے موقع پر جنرل ہیڈکوارٹر (جی ایچ کیو) راولپنڈی میں منعقدہ ایک خصوصی تقریب سے خطاب کرتے ہوئے کہی۔ تقریب میں چین کے سفیر جیانگ زائیڈونگ نے بطور مہمانِ خصوصی شرکت کی، جبکہ چینی دفاعی اتاشی میجر جنرل وانگ زونگ، چینی سفارتکار، اور پاکستان کی تینوں مسلح افواج کے سینئر افسران بھی موجود تھے۔

آئی ایس پی آر کے مطابق، فیلڈ مارشل عاصم منیر نے پیپلز لبریشن آرمی کو یومِ تاسیس کی مبارکباد دی اور چین کی سلامتی، دفاع اور قومی ترقی میں پی ایل اے کے کردار کو سراہا۔ انہوں نے پاک چین اسٹریٹجک شراکت داری کی اہمیت پر زور دیتے ہوئے کہا کہ دونوں ممالک عالمی اور علاقائی چیلنجز پر یکساں مؤقف رکھتے ہیں۔

انہوں نے کہا کہ بدلتی ہوئی اسٹریٹجک صورتحال کے باوجود پاک چین دوستی ثابت قدم ہے اور دونوں افواج کے تعلقات حقیقی معنوں میں بھائیوں جیسے ہیں۔ ان کا کہنا تھا کہ پاک فوج اور پی ایل اے کی مشترکہ عسکری شراکت داری خطے میں امن اور استحکام کے لیے کلیدی کردار ادا کرتی رہے گی۔

تقریب میں چینی سفیر نے فیلڈ مارشل عاصم منیر کی میزبانی اور تقریب کے انعقاد پر شکریہ ادا کیا۔ انہوں نے دہشتگردی کے خلاف جنگ میں پاکستانی مسلح افواج کے کردار کو سراہا اور پاکستان کے ساتھ اسٹریٹجک تعاون جاری رکھنے کے عزم کا اعادہ بھی کیا۔