یومِ استحصال کشمیر: بھارت کا 5 اگست کا اقدام سیاہ دن ہے، کشمیریوں کی جدوجہد میں ان کے ساتھ ہیں, سینیٹر اعظم نذیر تارڑ

اسلام آباد :سینیٹر اعظم نذیر تارڑ، وفاقی وزیر برائے قانون، انصاف و انسانی حقوق نے یومِ استحصال کشمیر کے موقع پر اپنے پیغام میں کشمیری عوام سے بھرپور یکجہتی کا اظہار کرتے ہوئے کہا ہے کہ 5 اگست 2019 کا دن کشمیر کی تاریخ کا سیاہ ترین باب ہے، جب بھارت نے اپنے آئین کے آرٹیکل 370 اور 35A کا خاتمہ کر کے مقبوضہ جموں و کشمیر کی خصوصی حیثیت کو ختم کیا۔

اعظم نذیر تارڑ نے کہا کہ بھارتی حکومت کا یہ اقدام نہ صرف اقوام متحدہ کی قراردادوں بلکہ بین الاقوامی قوانین کی بھی کھلی خلاف ورزی ہے۔ آج بھی مقبوضہ کشمیر بدترین محاصرے، میڈیا بلیک آؤٹ اور انسانی حقوق کی سنگین خلاف ورزیوں کی زد میں ہے۔ انہوں نے کہا کہ کشمیری عوام اپنے بنیادی حقوق اور آزادی کی جدوجہد میں جس بہادری سے ڈٹے ہوئے ہیں، وہ پوری انسانیت کے ضمیر کو جھنجھوڑنے کے لیے کافی ہے۔

وفاقی وزیر نے عالمی برادری سے مطالبہ کیا کہ وہ بھارتی مظالم پر خاموشی ترک کرے، کیونکہ خاموشی کسی حد تک جبر کا ساتھ دینے کے مترادف ہے۔ انہوں نے اس عزم کا اعادہ کیا کہ پاکستان ہر عالمی فورم پر بھارت کے غیر قانونی اقدامات کو بے نقاب کرتا رہے گا۔

اعظم نذیر تارڑ نے کہا کہ پاکستان، امن، انصاف اور آزادی کے حصول کے لیے کشمیری عوام کی جدوجہد میں ان کے ساتھ شانہ بشانہ کھڑا ہے، اور جب تک کشمیری عوام کو ان کا حقِ خود ارادیت نہیں مل جاتا، ہم ان کی حمایت جاری رکھیں گے۔