پاکستان کا آذربائیجان آرمینیا تاریخی امن معاہدے کا خیرمقدم

اسلام آباد : وزیراعظم شہباز شریف نے کہا ہے کہ پاکستان آذربائیجان اور آرمینیا کے درمیان وائٹ ہاؤس سمٹ میں امریکی صدر ڈونلڈ جے ٹرمپ کی سرپرستی میں طے پانے والے تاریخی امن معاہدے کا خیرمقدم کرتا ہے۔ ایکس پر اپنے پیغام میں وزیراعظم نے اس پیش رفت کو جنوبی قفقاز کے لیے ایک نئے دور کا آغاز قرار دیتے ہوئے کہا کہ یہ خطہ عشروں سے جاری تنازعات اور انسانی مصائب کا شکار رہا ہے، اور اب یہ معاہدہ امن، استحکام اور تعاون کا پیغام لاتا ہے۔

وزیراعظم نے آذربائیجان کے صدر الہام علییف اور عوام کو اس تاریخی کامیابی پر مبارکباد دیتے ہوئے کہا کہ یہ معاہدہ پُرامن مستقبل کی راہ ہموار کرنے میں آذربائیجان کی دانائی اور بصیرت کا مظہر ہے۔ انہوں نے کہا کہ پاکستان نے ہمیشہ برادر ملک آذربائیجان کا ساتھ دیا ہے اور اس تاریخ ساز لمحے پر بھی اس کے شانہ بشانہ کھڑا ہے۔

شہباز شریف نے امریکہ، بالخصوص صدر ڈونلڈ ٹرمپ کے اس معاہدے میں سہولت کار کردار کو سراہتے ہوئے کہا کہ یہ معاہدہ تجارت، روابط اور علاقائی انضمام کے نئے مواقع پیدا کرے گا۔ وزیراعظم نے امید ظاہر کی کہ مکالمے اور تعاون کی یہ روح دیگر ایسے خطوں کے لیے بھی مشعلِ راہ ثابت ہوگی جو طویل عرصے سے تنازعات کا شکار ہیں۔