پاکستان یوگاسنا اسپورٹس ٹیم کی شاندار کامیابی, ایشیائی چیمپئن شپ میں دو تمغے اپنے نام

اسلام آباد: (سید محمد یاسین ہاشمی) پاکستان یوگاسنا اسپورٹس فیڈریشن نے پہلی ہی بار ایشیائی چیمپئن شپ میں شرکت کرتے ہوئے شاندار کارکردگی کا مظاہرہ کیا اور دو قیمتی تمغے جیت لیے۔

کراچی کے نوجوان کھلاڑی محمد شایان سلیم اور محمد وسیم بلوچ نے ٹریڈیشنل کیٹیگری کی جونیئر کلاس میں دوسری پوزیشن حاصل کر کے چاندی کا تمغہ جیتا، جب کہ آرٹسٹک جوڑی کیٹیگری میں تیسری پوزیشن لے کر کانسی کا تمغہ بھی پاکستان کے نام کیا۔

چھٹی ایشیائی یوگاسنا چیمپئن شپ فجیرہ، متحدہ عرب امارات میں منعقد ہوئی، جس میں 16 ممالک کی مرد و خواتین ٹیموں نے بھرپور شرکت کی۔ تقریب کے مہمانِ خصوصی فجیرہ کے ولی عہد شیخ محمد بن حماد الشرقی تھے۔

اس موقع پر مختلف ممالک کی ممتاز شخصیات کو "ایشیائی ایکسیلینس ایوارڈ” سے نوازا گیا، جن میں پاکستان کے یوگا چاریہ ڈاکٹر وسیم طائ اور پروفیسر سید سخاوت علی شامل تھے۔ پاکستانی یوگاسنا اسپورٹس تنظیم کو بہترین کارکردگی پر "ایشیا کی بہترین تنظیم” کا خصوصی اعزاز بھی دیا گیا۔

چیمپئن شپ میں پاکستانی آفیشلز نے ججنگ کی ٹریننگ مکمل کر کے فرائض بھی سرانجام دیے۔ نمایاں آفیشلز میں شاہدہ شعیب رضوی، اقبال میمن، محمد سلیم، محمد اشتیاق کیانی اور میر شاہ محمد شامل تھے۔