رانا ثناء اللہ کے گھر حملہ کیس: پی ٹی آئی رہنماؤں سمیت 59 افراد کو 10 سال قید
انسداد دہشت گردی عدالت فیصل آباد نے 75 ملزمان کو سزا سنائی، 34 کو بری کر دیا۔
فیصل آباد : انسداد دہشت گردی عدالت فیصل آباد نے 9 مئی کو مسلم لیگ (ن) کے رہنما رانا ثناء اللہ کے گھر پر حملے کے کیس کا فیصلہ سناتے ہوئے پاکستان تحریک انصاف کے رہنماؤں عمر ایوب، شبلی فراز، زرتاج گل، کنول شوذب اور ایم پی اے شیخ شاہد جاوید سمیت 59 ملزمان کو 10،10 سال قید کی سزا سنائی۔
عدالت نے مزید 16 ملزمان کو 3 سال قید کی سزائیں سنائیں جبکہ 34 افراد کو بری کر دیا۔ یوں مجموعی طور پر 109 میں سے 75 ملزمان کو سزا دی گئی۔ تمام سزائیں ملزمان کی غیر موجودگی میں سنائی گئیں۔
فیصلے کے مطابق سابق وفاقی وزیر فواد چودھری اور پی ٹی آئی رہنما شاہ محمود قریشی کے صاحبزادے زین قریشی کو بری کر دیا گیا۔
یاد رہے کہ فیصل آباد میں 9 مئی کے جلاؤ گھیراؤ اور توڑ پھوڑ کے 4 مقدمات درج ہوئے تھے جن میں سے 3 کے فیصلے پہلے سنائے جا چکے ہیں۔ یہ کیس رانا ثناء اللہ کے گھر پر حملے اور توڑ پھوڑ کے حوالے سے سمن آباد تھانے میں درج ہوا تھا۔
