کیف پر روسی ڈرون اور میزائل حملہ، 17 ہلاک

کیف: روسی افواج نے یوکرین کے دارالحکومت کیف پر رات گئے بڑے پیمانے پر ڈرون اور میزائل حملہ کیا جس کے نتیجے میں 17 افراد ہلاک اور درجنوں زخمی ہوگئے۔

غیر ملکی میڈیا رپورٹس کے مطابق یوکرینی صدر ولادیمیر زیلنسکی نے بتایا کہ حملے میں 2 بچوں سمیت 17 افراد جاں بحق جبکہ 38 زخمی ہوئے، حملوں کے باعث 7 اضلاع میں رہائشی اور دیگر عمارتوں کو بھی شدید نقصان پہنچا ہے۔

زیلنسکی نے کہا کہ کیف پر ہونے والے اس حملے سے واضح ہے کہ روس کو حقیقی سفارتکاری میں کوئی دلچسپی نہیں ہے۔ ان کے مطابق روس مذاکرات کی میز کے بجائے بیلسٹک میزائلوں کا سہارا لیتا ہے اور جنگ ختم کرنے کے بجائے قتل و غارت گری جاری رکھے ہوئے ہے۔