پنجاب کے سیلابی علاقوں میں پاک فوج کا بھرپور ریسکیو آپریشن جاری
ہیلی کاپٹر اور کشتیوں کے ذریعے متاثرین کی محفوظ مقامات پر منتقلی، ریلیف کیمپس میں خوراک و طبی امداد فراہم
راولپنڈی:پنجاب کے مختلف سیلاب سے متاثرہ اضلاع میں پاک فوج کا ریسکیو اور ریلیف آپریشن تیزی سے جاری ہے۔ ترجمان کے مطابق سیالکوٹ، نارووال، گوجرانوالہ اور ہیڈ خانکی سمیت کئی متاثرہ علاقوں میں پاک فوج کے جوان شہریوں کو محفوظ مقامات پر منتقل کر رہے ہیں۔
ریسکیو آپریشن کے دوران ہیلی کاپٹروں اور کشتیوں کے ذریعے بزرگوں، خواتین اور بچوں سمیت متعدد افراد کو محفوظ مقامات تک پہنچایا گیا، جنہیں فوری طور پر امدادی مراکز میں منتقل کیا جا رہا ہے۔
پاک فوج نے سول انتظامیہ کے تعاون سے ریسکیو اینڈ ریلیف کیمپس بھی قائم کر دیے ہیں، جہاں متاثرین کو ابتدائی طبی امداد، خوراک اور دیگر ضروری سہولیات فراہم کی جا رہی ہیں۔
متاثرہ شہریوں نے پاک فوج کی بروقت کارروائی اور خدمت کو زبردست الفاظ میں سراہا ہے۔