سیلاب متاثرین کی مدد سب کی مشترکہ ذمے داری ہے، روبینہ خالد

بے نظیر انکم سپورٹ پروگرام (بی آئی ایس پی) کی چیئرپرسن سینیٹر روبینہ خالد نے صوابی، بونیر اور سوات کے سیلاب زدہ علاقوں کا دورہ کیا اور متاثرہ خاندانوں میں امدادی سامان تقسیم کیا۔ اس موقع پر

انہوں نے کہا کہ تمام سیاسی جماعتیں اپنے اختلافات بھلا کر سیلاب متاثرین کی مدد کریں۔

سینیٹر روبینہ خالد نے کہا کہ جاں بحق افراد کے لواحقین کا غم مشترکہ ہے، ہمیں مل کر ان کے دکھ بانٹنے ہوں گے۔ انہوں نے متاثرین میں کمبل، خیمے، پینے کا صاف پانی اور کھانے پینے کی اشیاء تقسیم کیں اور کہا کہ بی آئی ایس پی کی موبائل ٹیمیں گھر گھر جا کر سروے کر رہی ہیں تاکہ کوئی متاثرہ خاندان نظر انداز نہ ہو۔

ان کا کہنا تھا کہ بی آئی ایس پی کا عملہ مشکل وقت میں سیلاب زدگان کے ساتھ کھڑا ہے اور امدادی رقوم متاثرین کو ترجیحی بنیادوں پر فراہم کی جا رہی ہیں۔ انہوں نے مطالبہ کیا کہ سیلاب زدہ علاقوں کو آفت زدہ قرار دیا جائے اور وفاقی و صوبائی حکومتیں مل کر متاثرین کی بحالی کے لیے اقدامات کریں۔

چیئرپرسن بی آئی ایس پی نے مخیر حضرات اور بین الاقوامی ڈونرز سے بھی اپیل کی کہ وہ آگے آ کر سیلاب متاثرین کی مدد کریں۔ انہوں نے کہا کہ متاثرین فوری امداد اور صحت کی سہولیات کے منتظر ہیں، ان کی آباد کاری اور روزگار کی بحالی کے لیے ٹھوس اقدامات نہایت ضروری ہیں۔