دبئی: مینز ٹی 20 ایشیا کپ میں بھارتی ٹیم کا سفر آج سے شروع ہوگا، بلو شرٹس کا ابتدائی ٹاکرا یو اے ای سے دبئی میں شیڈول ہے۔
دونوں ٹیموں کے درمیان میچ مقامی وقت کے مطابق ساڑھے 7 بجے شب کھیلا جائے گا، بھارت طویل وقفے کے بعد بین الاقوامی کرکٹ میں واپسی کر رہا ہے، بطور ٹی 20 عالمی چیمپئن بھارت ایونٹ میں فیورٹ ہے۔
شبمن گل ٹی 20 میں بطور نائب کپتان واپسی کر رہے ہیں، حالیہ سیزن میں انہوں نے آئی پی ایل میں 650 رنز 155.87 کے سٹرائیک ریٹ سے بنا رکھے ہیں اور ایشیا کپ میں بھی ان سے بہترین پرفارمنس کی توقع کی جا رہی ہے۔
دوسری جانب یو اے ای کے کوچ بھارتی نژاد لال چند راجپوت ہیں، انہوں نے بھارت کو 2007 کے ٹی 20 ورلڈ کپ میں فاتح بنوانے میں بھی اہم کردار ادا کیا تھا۔
میزبان متحدہ عرب امارات کی ٹیم حالیہ سہ ملکی سیریز میں افغانستان اور پاکستان سے بھی ہار چکی ہے جبکہ اس سے قبل یوگینڈا نے بھی اسے مات دی تھی۔
یواے ای کے سپنر سمرنجیت سنگھ اب انٹرنیشنل کرکٹ میں شبمن گل کو بولنگ کریں گے، دبئی کی پچ کے زیادہ تازہ اور جاندار ہونے کی توقع ہے، امکان ہے کہ پیسرز اور سپنرز کو یکساں مدد ملے گی، شہر کی گرمی اور نمی دونوں ٹیموں کی فٹنس کا امتحان ہو گی۔
یو اے ای نے بھارت کا سامنا صرف ایک بار ٹی 20 میں کیا ہے جب 2016 ایشیا کپ میں خلیجی ٹیم کو 9 وکٹوں سے شکست ہو گئی تھی، اسی طرح بھارت نے گزشتہ ٹی 20 ورلڈ کپ سے اب تک 24 فتوحات سمیٹی ہیں جبکہ 3 میں اسے ناکامی کا سامنا رہا ہے۔
