پاکستان پیپلز پارٹی کی قیادت سرگرم، ہمایون خان سے اہم رہنماؤں کی ملاقاتیں

اسلام آباد: پاکستان پیپلز پارٹی کے سیکرٹری جنرل محمد ہمایون خان سے پارٹی رہنماؤں کی الگ الگ ملاقاتیں ہوئیں جن میں پارٹی امور، تنظیمی حکمت عملی اور موجودہ سیاسی صورتحال پر تفصیلی تبادلہ خیال کیا گیا۔

پہلی ملاقات میں سابق وفاقی وزیر ساجد حسین طوری نے ہمایون خان سے ملاقات کی جس میں پارٹی کی تنظیمی مضبوطی، کارکنوں کی شمولیت اور قبائلی اضلاع میں پیپلز پارٹی کے کردار پر بات چیت کی گئی۔ اس موقع پر آئندہ عام انتخابات کی تیاریوں، عوامی مسائل کے حل اور پارٹی منشور کے فروغ پر بھی تبادلہ خیال ہوا۔ دونوں رہنماؤں نے اس بات پر اتفاق کیا کہ قبائلی اضلاع میں جاری ترقیاتی منصوبوں اور عوامی مسائل کے حل کے لیے مشترکہ کوششیں کی جائیں گی۔

دوسری ملاقات میں ممبر پنجاب کونسل چوہدری بنارس، ضلع اورکزئی صدر اقبال حسین سمیت علی اعوان، منور زاد خان ایڈووکیٹ اور دلنواز خان جیسے پارٹی رہنما شریک ہوئے۔ اس ملاقات میں پارٹی کی تنظیمی صورتحال، آئندہ انتخابات کی حکمت عملی اور موجودہ سیاسی و معاشی حالات پر گفتگو کی گئی۔

ہمایون خان نے پارٹی رہنماؤں کو ہدایت کی کہ عوامی رابطہ مہم کو مزید مؤثر بنایا جائے، کارکنوں کو متحرک رکھا جائے اور نوجوانوں کو سیاسی عمل میں شامل کیا جائے۔ انہوں نے کہا کہ پاکستان پیپلز پارٹی ایک جمہوری جماعت ہے جو ہمیشہ عوامی خدمت اور شفاف سیاست پر یقین رکھتی ہے۔

ان کا کہنا تھا کہ جمہوری استحکام، امن و امان اور عوامی فلاح کے لیے تمام سیاسی جماعتوں کو مل کر کردار ادا کرنا ہوگا اور پیپلز پارٹی ہر سطح پر عوامی خدمت کے مشن کو آگے بڑھاتی رہے گی۔