اسلام آباد ٹریفک پولیس کی بڑی کارروائی: ون وے خلاف ورزی پر 93 ڈرائیورز گرفتار، 319 گاڑیاں و موٹرسائیکلز تھانوں میں بند

 اسلام آباد: ٹریفک پولیس کی یک طرفہ راستہ خلاف ورزی کے خلاف بڑی کارروائی، 93 ڈرائیورز گرفتار، 319 گاڑیاں و موٹرسائیکلز تھانوں میں بند رپورٹ: سید محمد یاسین ہاشمی اسلام آباد ٹریفک پولیس نے یک طرفہ راستہ (ون وے) اور دیگر ٹریفک قوانین کی خلاف ورزی کرنے والے ڈرائیورز کے خلاف سخت کارروائیاں شروع کر دی ہیں۔ اس دوران اب تک 93 ڈرائیورز کے خلاف مقدمات درج کیے جاچکے ہیں جبکہ 319 گاڑیاں اور موٹر سائیکلز مختلف تھانوں میں بند کر دی گئیں۔

تفصیلات کے مطابق انسپکٹر جنرل آف پولیس اسلام آباد سید علی ناصر رضوی کی خصوصی ہدایت پر ٹریفک قوانین کی خلاف ورزیوں کے سدباب اور شہریوں کو حادثات سے محفوظ رکھنے کے لیے ٹریفک پولیس نے خصوصی ٹیمیں تشکیل دی ہیں۔ یہ ٹیمیں وفاقی دارالحکومت کی بڑی شاہراہوں اور اہم مقامات پر کارروائیاں کر رہی ہیں۔ چیف ٹریفک آفیسر اسلام آباد کیپٹن (ر) حمزہ ہمایوں نے کہا ہے کہ یک طرفہ راستہ خلاف ورزی نہ صرف ٹریفک کی روانی کو متاثر کرتی ہے بلکہ جان لیوا حادثات اور قیمتی انسانی جانوں کے ضیاع کا بھی باعث بنتی ہے۔ ان کا کہنا تھا کہ شہریوں کی جان و مال کا تحفظ اسلام آباد پولیس کی اولین ترجیح ہے اور ون وے کی خلاف ورزی کسی صورت برداشت نہیں کی جائے گی۔ سی ٹی او نے شہریوں سے اپیل کی کہ وہ ٹریفک قوانین کی پاسداری کریں، ون وے کی خلاف ورزی سے اجتناب کریں اور محفوظ ڈرائیونگ کو یقینی بنا کر اپنی اور دوسروں کی جانوں کو حادثات سے محفوظ رکھیں۔