ورلڈ ہارٹ ڈے پر پناہ کی آگاہی واک، دل کی صحت اور قانون سازی پر زور

راولپنڈی:  پاکستان نیشنل ہارٹ ایسوسی ایشن (پناہ) نے ورلڈ ہارٹ ڈے کے موقع پر راولپنڈی پریس کلب کے سامنے آگاہی واک کا اہتمام کیا۔ واک میں پناہ کے اراکین، سول سوسائٹی کے نمائندگان، طلباء، اساتذہ، صحت کے ماہرین اور الیکٹرانک و پرنٹ میڈیا کے نمائندوں نے بھرپور شرکت کی۔ شرکاء نے دل کی صحت کے پیغام پر مبنی پلے کارڈز اور بینرز اٹھا رکھے تھے۔

واک سے خطاب کرتے ہوئے صدر پناہ میجر جنرل (ر) مسعود الرحمن کیانی نے دل کی بیماریوں سے بچاؤ کے لیے طرزِ زندگی میں تبدیلی پر زور دیا۔ انہوں نے عوام کو تلقین کی کہ وہ باقاعدہ ورزش کو معمول بنائیں، غیر صحت مند غذا سے پرہیز کریں، ذہنی دباؤ سے بچیں اور باقاعدگی سے طبی معائنہ کروائیں۔

جنرل سیکرٹری پناہ، مسٹر ثناءاللہ گھمن نے اس عزم کا اعادہ کیا کہ پناہ پاکستانی عوام کو امراضِ قلب سے محفوظ رکھنے کے لیے اپنی جدوجہد جاری رکھے گی۔ انہوں نے کہا کہ یہ آگاہی واک پناہ کی جاری مہم کا ایک حصہ ہے جس کا مقصد بچاؤ کے اقدامات کو فروغ دینا ہے۔ انہوں نے حکومت سے مطالبہ کیا کہ غیر صحت مند خوراک کے استعمال کو کم کرنے کے لیے سخت قوانین متعارف کرائے جائیں کیونکہ یہی امراضِ قلب کی سب سے بڑی وجہ ہیں۔

دیگر مقررین نے بھی اپنے خطاب میں احتیاطی تدابیر اپنانے کی ضرورت پر زور دیا اور کہا کہ صحت مند طرزِ زندگی ہی ملک میں دل کے امراض کے بوجھ کو کم کرنے کی بنیادی کنجی ہے۔

ورلڈ ہارٹ ڈے ہمیں عالمی سطح پر یہ یاد دہانی کرواتا ہے کہ دل کی صحت کو اولین ترجیح دی جائے۔ اس واک کے ذریعے پناہ نے ایک بار پھر اس عزم کو دوہرایا کہ وہ پاکستان کے عوام کے لیے صحت مند مستقبل قائم کرنے کی اپنی جدوجہد جاری رکھے گی۔