وزیراعظم شہباز شریف نے کہا ہے کہ غزہ میں جنگ بندی ایک بڑی انسانی خدمت ہے اور پاکستان کو اس میں اپنا کردار ادا کرنے پر فخر ہے۔
جہانیاں میں خطاب کرتے ہوئے شہباز شریف کا کہنا تھاکہ پاکستان نے معاشی استحکام اور سفارتی کامیابیوں کی نئی مثال قائم کی، پاکستان نے گزشتہ ڈیڑھ سال میں دیوالیہ پن کے خطرے سے نکل کر معاشی استحکام کی راہ اختیار کی ہے۔
انہوں نے کہا کہ ملکی معیشت کے تمام اشاریے بہتری کی جانب گامزن ہیں، حکومت شبانہ روز محنت کے ساتھ پاکستان کو ترقی اور خوشحالی کی جانب لے جا رہی ہے، مریم نواز اور ان کی ٹیم نے محنت، دیانت اور خلوص سے عوامی خدمت کی نئی مثال قائم کی ہے، پنجاب میں ٹرانسپورٹ، تعلیم، صحت اور سڑکوں کے منصوبوں کو عوامی ریلیف یقینی بنایا گیا۔
وزیراعظم کا کہنا تھاکہ پاکستان کو حالیہ دنوں میں بھارت کے خلاف دفاعی میدان میں عظیم فتح نصیب ہوئی، افواجِ پاکستان کی جرات، بہادری اور اللہ تعالیٰ کے فضل و کرم کا نتیجہ ہے، فیلڈ مارشل سید عاصم منیر کی قیادت میں پاک افواج نے وطنِ عزیز کا دفاع یقینی بنایا اور دنیا بھر میں پاکستان کا نام روشن کیا، پاک فضائیہ کے سربراہ ظہیر بابر سدھو کے شاہینوں نے دشمن پر کاری ضرب لگائی۔
انہوں نے مزید کہا کہ سعودی عرب کے ساتھ تعلقات میں نئی گرمجوشی پیدا ہوئی ہے، سعودی قیادت نے پاکستان کے ساتھ مثالی تعاون کا اظہار کیا ہے۔
غزہ کے حوالے سے وزیراعظم کا کہنا تھاکہ اقوامِ متحدہ میں صدر ٹرمپ، صدر اردوان، اور صدر عبدالفتاح السیسی سمیت عالمی رہنماؤں سے ملاقاتیں ہوئیں، غزہ جنگ بندی کے لیے پاکستان نے کلیدی کردار ادا کیا، پاکستان نے امن اور انسانی حقوق کے تحفظ کے لیے نمایاں کردار ادا کیا جسے عالمی سطح پر سراہا گیا، غزہ میں جنگ بندی ایک بڑی انسانی خدمت ہے اور پاکستان کو اس میں اپنا کردار ادا کرنے پر فخر ہے۔
انہوں نے کہا کہ تمام سیاسی قوتوں کو اختلافات سے بالاتر ہو کر قومی مفاد میں مل کر کام کرنا ہوگا، پاکستان کے خوابوں کو حقیقت بنانا ہے، ہمیں دیانت، امانت اور محنت کے ساتھ دن رات کام کرنا ہوگا، پاکستان کی ترقی ہی سب کی کامیابی ہے اور پاکستان کی عزت ہے تو ہماری عزت ہے، پاکستان ہے تو ہم سب ہیں، آئیے مل کر پاکستان کو عظیم بنائیں۔
