خواتین تاجروں کے بغیر پاک، ترکیہ تجارتی ہدف حاصل کرنا ممکن نہیں،قونصل جنرل ترکیہ
جمہوریہ ترکیہ کے پاکستان میں قونصل جنرل مہمت ایمن سمسک ، ویمن چیمبر آف کامرس اینڈ انڈسٹری سیالکوٹ کی صدر ڈاکٹر مریم صدیقہ اور ٹریڈ ڈویلپمنٹ اتھارٹی آف پاکستان کی سینئر ڈائریکٹر جنرل فوزیہ پروین چوہدری نے جمعہ کے روز ہیریٹیج کلب میں ویمن چیمبر آف کامرس اینڈ انڈسٹری سیالکوٹ کے زیر اہتمام منعقدہ خواتین کی چوتھی نمائش “وی ایگزیبٹ 2026” کا افتتاح کیا۔
تقریب سے خطاب کرتے ہوئے قونصل جنرل ترکیہ مہمت ایمن سمسک نے کہا کہ ترکیہ اورپاکستان کے درمیان تعلقات مضبوط سماجی اور ثقافتی رشتوں پر مبنی ہیں۔ انہوں نے کہا کہ دونوں ممالک کے سیاسی، دفاعی اور عسکری شعبوں میں مثالی تعلقات قائم ہیں جبکہ تجارتی میدان میں بے پناہ استعداد موجود ہے، تاہم اس صلاحیت سے ابھی مکمل طور پر استفادہ نہیں کیا جا سکا۔انہوں نے کہا کہ اس وقت دوطرفہ تجارتی حجم 1.2 سے 1.3 ارب ڈالر کے درمیان ہے جبکہ ہدف 5 ارب ڈالر مقرر کیا گیا ہے۔
انہوں نے کہا کہ 5 ارب ڈالر کے تجارتی ہدف کا حصول خواتین تاجروں کے بغیر ممکن نہیں، اسی لیے ایسی کاوشوں کو خصوصی اہمیت دی جا رہی ہے۔قونصل جنرل نے کہا کہ ترکش ائیر لائنزکی سیالکوٹ میں دلچسپی اس خطے کی معاشی و تجارتی اہمیت کا واضح ثبوت ہے۔ انہوں نے امید ظاہر کی کہ ویمن چیمبر آف کامرس اینڈ انڈسٹری سیالکوٹ کی یہ کاوش نئی کاروباری راہوں کی تلاش میں اہم پیش رفت ثابت ہوگی۔
