ایک نمایاں پاکستانی نژاد امریکی سیاسی تنظیم نے امریکہ اور ایران کے درمیان جنگ بندی کروانے پر پاکستان کی قیادت کو مبارکباد دی ہے اور امید ظاہر کی ہے کہ یہ اقدام مشرق وسطیٰ میں دیرپا امن کی راہ ہموار کرے گا۔
امریکن پاکستان پبلک افیئرز کمیٹی (APPAC) نے منگل کو جاری بیان میں کہا،
“بطور پاکستانی نژاد امریکی، ہمیں اس کامیابی پر بے حد فخر ہے۔”
بیان میں کہا گیا کہ یہ ایک تاریخی موڑ ہے جو نہ صرف فوری تباہی کو روکتا ہے بلکہ پائیدار امن، معاشی ترقی اور خطے میں ہم آہنگی، تعاون اور ترقی کی بنیاد بھی رکھتا ہے۔
بیان کے مطابق وزیر اعظم شہباز شریف، فیلڈ مارشل عاصم منیر اور نائب وزیر اعظم و وزیر خارجہ اسحاق ڈار کی قیادت میں پاکستان نے اس تاریخی جنگ بندی کے حصول میں مضبوط عزم کا مظاہرہ کیا۔
APPAC کے چیئرمین ڈاکٹر اعجاز احمد اور میڈیا ریلیشنز کے ڈائریکٹر اسد چوہدری نے امید ظاہر کی کہ یہ امن اقدام خطے میں تعاون کے نئے دور کا آغاز کرے گا اور مسلم اکثریتی ممالک کو قریب لانے میں مددگار ثابت ہوگا۔
