چیئرمین ہائر ایجوکیشن کمیشن (HEC) پاکستان پروفیسر ڈاکٹر نیاز احمد اختر (ستارۂ امتیاز) نے فاطمہ جناح ویمن یونیورسٹی (FJWU) راولپنڈی میں 756.38 کلو واٹ گرڈ ٹائیڈ سولر سسٹم بمعہ نیٹ میٹرنگ اور ڈی جی سنکرونائزیشن کا افتتاح کیا۔ یہ منصوبہ یونیورسٹی کے ماحول دوست، پائیدار اور توانائی کے مؤثر استعمال کے وژن کی جانب ایک اہم سنگِ میل ہے۔
سولرائزیشن منصوبہ 10 کروڑ روپے کی لاگت سے مکمل کیا گیا، جس میں 5 کروڑ روپے ہائر ایجوکیشن کمیشن جبکہ 5 کروڑ روپے فاطمہ جناح ویمن یونیورسٹی نے فراہم کیے۔ منصوبے کے تحت 476.72 کلو واٹ سولر سسٹم سٹی کیمپس اور 279.66 کلو واٹ کیمپس-II میں نصب کیا گیا ہے۔ منصوبے کے کنسلٹنٹ USPCASE، یو ای ٹی پشاور جبکہ کنٹریکٹر میسرز ایسوسی ایٹڈ ٹیکنالوجیز (پرائیویٹ) لمیٹڈ تھے۔
تقریب کے دوران وائس چانسلر پروفیسر ڈاکٹر بشریٰ مرزا (تمغۂ امتیاز، تمغہ حسن کارکردگی) نے یونیورسٹی کی مجموعی کارکردگی، قومی و بین الاقوامی درجہ بندی، تحقیق، اختراع، عالمی شراکت داریوں اور پائیدار ترقی کے اقدامات پر مبنی پریزنٹیشن پیش کی۔
اپنے خطاب میں چیئرمین HEC پروفیسر ڈاکٹر نیاز احمد اختر نے منصوبے کی کامیاب تکمیل پر یونیورسٹی کو مبارکباد دی اور قومی و بین الاقوامی سطح پر فاطمہ جناح ویمن یونیورسٹی کی نمایاں کامیابیوں کو سراہا۔ انہوں نے اعلیٰ تعلیم، تحقیق، جدت، اور پائیدار انفراسٹرکچر کے فروغ کے لیے HEC کی جانب سے مستقبل میں بھی بھرپور تعاون کی یقین دہانی کرائی۔ انہوں نے اس بات پر بھی زور دیا کہ اساتذہ قوم کی تعمیر اور مستقبل کی قیادت کی تشکیل میں بنیادی کردار ادا کرتے ہیں، لہٰذا ان کی استعداد کار میں مسلسل اضافہ ناگزیر ہے۔
اس موقع پر وائس چانسلر پروفیسر ڈاکٹر بشریٰ مرزا نے ہائر ایجوکیشن کمیشن کا شکریہ ادا کرتے ہوئے کہا کہ یہ منصوبہ یونیورسٹی کے سبز، پائیدار اور توانائی کے مؤثر کیمپس کے وژن کی عملی تعبیر ہے اور ماحولیاتی تحفظ کے ساتھ ساتھ مالی بچت میں بھی اہم کردار ادا کرے گا۔
یونیورسٹی کے پلاننگ اینڈ ڈویلپمنٹ ڈائریکٹوریٹ کے مطابق یہ سولر سسٹم صاف توانائی کی پیداوار شروع کر چکا ہے، جس سے بجلی کے اخراجات میں نمایاں کمی آئے گی، جبکہ منصوبے کی لاگت تقریباً ڈھائی سے اڑھائی سال میں پوری ہونے کی توقع ہے۔
تقریب کے اختتام پر ڈائریکٹر پلاننگ اینڈ ڈویلپمنٹ پروفیسر ڈاکٹر طاہر مختار نے مہمانِ خصوصی، ہائر ایجوکیشن کمیشن، یونیورسٹی انتظامیہ، منصوبے کے شراکت داروں، فیکلٹی، عملے اور دیگر متعلقہ اداروں کا شکریہ ادا کرتے ہوئے اس عزم کا اظہار کیا کہ یونیورسٹی مستقبل میں بھی پائیدار ترقی اور جدید انفراسٹرکچر کے منصوبوں پر کام جاری رکھے گی۔
