وزیراعظم شہباز شریف نے یومِ آزادی کے موقع پر پیغام دیتے ہوئے کہا کہ حکومت نے ڈھائی سالوں میں نہایت مشکل مراحل عبور کر کے مستحکم معیشت کا ہدف حاصل کیا ہے، آج پاکستان ایک مضبوط، پُرعزم، باوقار اور امن کی توانا آواز کے طور پہچانا جاتا ہے۔
اپنے پیغام میں وزیراعظم شہباز شریف کا کہنا تھا کہ آج پاکستان کی آزادی کے 79 سال مکمل ہونےکے موقع پر اہل وطن کومبارکباد پیش کرتا ہوں، آج ہم بحیثیت قوم تحریک آزادی کے قائدین، کارکنان کو سلام پیش کرتے ہیں، قائدِاعظم محمد علی جناح کی مدبرانہ قیادت اور ہمارےبزرگوں کی قربانیوں کی بدولت آزاد مملکت کاخواب شرمندہِ تعبیر ہوا، تحریک آزادی کے تمام رہنماؤں کی ولولہ انگیز سیاسی جدوجہد نے مسلمانان ہند کو آزاد وطن کے نصب العین پر متحد کیا۔
وزیراعظم نے یہ بھی کہا کہ ہمارے آبا ؤ اجداد نےقربانیوں، صعوبتوں اور تکالیف کی داستان رقم کی اور جدوجہد آزادی کامیابی سے ہمکنار ہوئی، ہمیں ایسی سر زمین میسر ہوئی جہاں آزاد قوم کی حیثیت سے عزت، وقار، دین و تہذیبی اقدار کے مطابق زندگی استوار کر سکیں، پاکستان اسلامی تعلیمات اور بابائے قوم کے نظریات کے مطابق تمام شہریوں کے لیے بلا تفریقِ رنگ ونسل مکمل آزادی کی ضمانت ہے۔
انہوں نے پیغام میں مزید کہا کہ آئین و قوانینِ پاکستان تمام شہریوں کے حقوق کے ضامن ہیں، پاکستان کی ترقی و خوشحالی کا یہ سفر تابناک مستقبل کی جانب گامزن ہے، حکومت نے ڈھائی سالوں میں نہایت مشکل مراحل عبور کر کے مستحکم معیشت کا ہدف حاصل کیا ہے اور اب ترقی یافتہ معیشت کی منزل کی جانب کامیابی سے گامزن ہے، 2 برس کے دوران بیرونِ ملک مقیم پاکستانیوں کی ترسیلاتِ زر میں 11.3 ارب ڈالر کا اضافہ ہوا۔
وزیراعظم شہباز شریف کا کہنا تھا ہماری بہادر افواج نے دشمن کے ہر وار کے جواب میں مادر وطن کے دفاع کو ناقابلِ تسخیر ثابت کیا ہے، پاکستان اپنی افواج پر فخر کرتا ہے، معرکۂ حق میں مسلح افواج نے فیلڈ مارشل کی قیادت میں اتحاد، عزم اور بے مثال بہادری کا مظاہرہ کیا، پاکستان اپنے دفاع اور آبی وسائل سمیت قومی مفادات کے تحفظ کے لیے کسی قربانی سے دریغ نہیں کرے گا۔
شہباز شریف کا کہنا تھا کہ آج پاکستان اقوام عالم میں ایک مضبوط، پُرعزم، باوقار اور امن کی توانا آواز کے طور پہچانا جاتا ہے، خطےکی مشکل اور چیلنجنگ علاقائی صورتحال میں پاکستان ایک ذمہ دار اور خطے میں استحکام کا ضامن ملک بن کر ابھرا ہے، پاکستان امن، استحکام اور علاقائی تعاون کےفروغ میں تعمیری کردار ادا کر رہا ہے۔
