راولپنڈی: پاکستان نیشنل ہارٹ ایسوسی ایشن (پناہ) کے جنرل سیکریٹری جناب ثناء اللہ گھمن نے 79ویں یومِ آزادی کے موقع پر پاکستان کے عوام کو دلی مبارکباد اور نیک خواہشات پیش کیں۔
اپنے پیغام میں جناب ثناء اللہ گھمن نے کہا کہ یومِ آزادی صرف آزادی اور ہمارے قومی ہیروز کی قربانیوں کو یاد کرنے کا موقع نہیں بلکہ ان کی دی ہوئی اُس امانت پاکستان کی دیکھ بھال کرنا اور اس کو مضبوط بھی بنانا ہے اور اُس کے لیے ذہنی اور جسمانی طور پر قوم کا صحتمند ہونا بہت ضروری ہے۔ انہوں نے کہا کہ پناہ 1984 سے عوام کی صحت اور فلاح و بہبود کو بہتر بنانے کے لیے آگاہی اور صحت مند پالیسیوں اور طرزِ زندگی کے فروغ کے لیے مسلسل کام کر رہی ہے اور کسی بھی قوم کی طاقت اس کے عوام کی صحت میں ہوتی ہے اور“ایک صحت مند قوم ہی مضبوط ملک اور مضبوط معیشت قائم کر سکتی ہے، اپنے بچوں کو تعلیم دے سکتی ہے، اپنے خاندانوں کا تحفظ کر سکتی ہے اور ملک کی ترقی میں مؤثر کردار ادا کر سکتی ہے۔”
جناب ثناء اللہ گھمن نے شہریوں پر زور دیا کہ وہ صحت مند طرزِ زندگی کو اپنی روزمرہ زندگی کا لازمی حصہ بنائیں، متوازن غذا اپنائیں، زیادہ چینی، نمک اور غیر صحت مند چکنائیوں والی مصنوعات کے استعمال میں کمی کریں، تمباکو سے اجتناب کریں، جسمانی سرگرمی کو معمول بنائیں اور خوراک کے انتخاب میں باخبر فیصلے کریں۔انہوں نے کہا،“اس یومِ آزادی پر ہمیں یہ عہد کرنا چاہیے کہ جس طرح ہم اپنے ملک کی آزادی اور مستقبل کو اہمیت دیتے ہیں، اسی طرح اپنی صحت کا بھی تحفظ کریں گے۔ ایک صحت مند پاکستان ہی ایک خوشحال پاکستان کی بنیاد ہے۔”
جناب ثناء اللہ گھمن نے پاکستان کی ترقی، امن، خوشحالی اور عوام کی اچھی صحت کے لیے دعا کرتے ہوئے امید ظاہر کی کہ قوم اتحاد، ذمہ داری اور صحت مند مستقبل کے عزم کے ساتھ آگے بڑھتی رہے گی۔
