پیر مہر علی شاہ بارانی زرعی یونیورسٹی راولپنڈی میں پاکستان کا 79واں یومِ آزادی قومی جذبے، جوش و خروش اور ملی ولولے کے ساتھ منایا گیا۔ اس سلسلے میں یونیورسٹی میں پرچم کشائی اور کیک کاٹنے کی تقریب منعقد ہوئی، جس میں وائس چانسلر پروفیسر ڈاکٹر قمر الزمان، رجسٹرار، ڈینز، ڈائریکٹرز، فیکلٹی ممبران، انتظامی افسران و ملازمین اور بچوں کی کثیر تعداد نے شرکت کی۔
تقریب سے خطاب کرتے ہوئے وائس چانسلر پروفیسر ڈاکٹر قمر الزمان نے کہا کہ یومِ آزادی ہمیں ان عظیم شہداء کو یاد کرنے اور انہیں خراجِ عقیدت پیش کرنے کا موقع فراہم کرتا ہے جنہوں نے پاکستان کے قیام اور دفاع کے لیے اپنی جانوں کے نذرانے پیش کیے۔ انہوں نے بالخصوص قائداعظم محمد علی جناحؒ، ان کے رفقاء اور ساتھیوں کو خراجِ تحسین پیش کیا جن کی انتھک جدوجہد، عزم اور قربانیوں کے نتیجے میں پاکستان معرضِ وجود میں آیا۔
وائس چانسلر نے کہا کہ پاک افواج قوم کی طاقت اور فخر کا باعث ہیں۔ معرکۂ حق کا حوالہ دیتے ہوئے انہوں نے کہا کہ پاکستان کی جانب سے حالیہ عزم، حوصلے اور قومی یکجہتی کے شاندار مظاہرے نے ملک کے دشمنوں کو واضح اور مؤثر پیغام دیا ہے کہ پاکستان اپنی خودمختاری، سلامتی اور علاقائی سالمیت کے دفاع کی مکمل صلاحیت رکھتا ہے۔
انہوں نے مزید کہا کہ پاکستان، سعودی عرب اور ترکیہ کے درمیان حالیہ مکہ مکرمہ مشترکہ دفاعی معاہدہ ایک اہم پیش رفت ہے، جو دوست ممالک کے پاکستان پر اعتماد اور باہمی تعاون کی عکاسی کرتا ہے۔ انہوں نے اس امر پر زور دیا کہ مضبوط سفارتی اور دفاعی روابط خطے میں امن، استحکام اور باہمی تعاون کے فروغ میں اہم کردار ادا کرتے ہیں۔
ملک کے نوجوانوں کا ذکر کرتے ہوئے وائس چانسلر نے کہا کہ نوجوان پاکستان کا مستقبل ہیں اور قوم کی ان سے بڑی توقعات وابستہ ہیں۔ انہوں نے نوجوانوں پر زور دیا کہ وہ جدید ٹیکنالوجی بالخصوص جدید ڈیجیٹل ذرائع کا تعمیری اور مفید استعمال کریں اور اپنی صلاحیتوں کو مثبت اور معاشرے کے لیے مفید سرگرمیوں میں بروئے کار لائیں۔
یومِ آزادی کی تقریبات کے سلسلے میں یونیورسٹی گرین آفس نے پاکستان ٹورازم ڈویلپمنٹ کارپوریشن اور لائف سیور کے تعاون سے ڈبل ڈیکر بس کے ذریعے اسلام آباد کے تفریحی و سیاحتی مقامات کی سیر کا بھی اہتمام کیا۔ وائس چانسلر پروفیسر ڈاکٹر قمر الزمان، رجسٹرار، ڈینز، ڈائریکٹرز، فیکلٹی ممبران، انتظامی افسران و ملازمین اور بچوں نے اس مطالعاتی و تفریحی دورے میں شرکت کی اور وفاقی دارالحکومت کے مختلف اہم اور تاریخی مقامات کا دورہ کیا۔ وائس چانسلر نے اس اقدام کو سراہتے ہوئے کہا کہ قومی دنوں کے موقع پر اس نوعیت کی سرگرمیاں نئی نسل میں حب الوطنی کے جذبات اجاگر کرنے کے ساتھ ساتھ قومی مواقع کو بامقصد اور یادگار انداز میں منانے کا موقع فراہم کرتی ہیں۔
تقریب کے اختتام پر پاکستان کے شہداء کے درجات کی بلندی، ملک کی سلامتی، امن و استحکام، خوشحالی اور ترقی کے لیے خصوصی دعائیں کی گئیں۔
