امریکی سفارتخانے اسلام آباد نے یونائیٹڈ اسٹیٹس ایجوکیشنل فاؤنڈیشن اِن پاکستان (USEFP) میں “آرٹس انٹرپرینیورشپ شوکیس” کا انعقاد کیا، جس میں فنکاروں، ڈیزائنرز، کاروباری شخصیات اور ثقافتی رہنماؤں نے شرکت کی۔
تقریب کا مقصد تخلیقی صنعتوں کے ذریعے معاشی ترقی، پاک امریکا تعلقات کے فروغ اور مختلف ثقافتوں کے درمیان روابط کو اجاگر کرنا تھا۔ امریکی ناظم الامور نٹالی بیکر اور معروف پاکستانی فیشن ڈیزائنر حسن شہریار یاسین (HSY) نے تقریب میں خصوصی شرکت کی، جبکہ معروف براڈکاسٹر اور فلم ساز توصیق حیدر نے میزبانی کی۔
یہ تقریب امریکی آزادی کی 250ویں سالگرہ کے سلسلے میں جاری “Freedom 250” اقدام کا حصہ تھی۔ پروگرام میں کاروباری تجربات اور جدید طریقہ کار پر خصوصی لیکچر، پاکستان-امریکا ایلومنائی نیٹ ورک (PUAN) سے وابستہ 20 افراد کے تخلیقی کاموں پر مشتمل مارکیٹ پلیس اور امریکی فیشن و ٹیکسٹائل کی 250 سالہ جدت کو اجاگر کرنے والا فیشن رن وے شو شامل تھا۔
امریکی ناظم الامور نٹالی بیکر نے کہا کہ آرٹس اور تخلیقی صنعتیں اقوام اور عوام کے درمیان دیرپا روابط قائم کرنے کی منفرد صلاحیت رکھتی ہیں۔ انہوں نے پاک امریکا ٹیکسٹائل شعبے کے گہرے تعلقات کو اجاگر کرتے ہوئے بتایا کہ گزشتہ پانچ برسوں کے دوران امریکا کو پاکستان کی تیار ملبوسات اور کپڑوں کی برآمدات اوسطاً 4 ارب ڈالر سالانہ سے زیادہ رہی ہیں۔
انہوں نے کہا کہ امریکا پاکستان کو کپاس فراہم کرنے والے بڑے ممالک میں شامل ہے، جس سے دونوں ممالک کی ٹیکسٹائل سپلائی چین کے باہمی انحصار کی عکاسی ہوتی ہے۔
تقریب میں پیش کیا جانے والا فیشن رن وے شو امریکی فیشن، ٹیکسٹائل، ڈیزائن اور ثقافتی ورثے کی 250 سالہ تاریخ کا عکاس تھا۔
