یومِ آزادی پر آئی ایس پی آر کا نیا ملی نغمہ "دل سے پاکستان” جاری

اسلام آباد – یومِ آزادی کے موقع پر انٹر سروسز پبلک ریلیشنز (آئی ایس پی آر) نے وطن سے محبت، قومی یکجہتی اور مسلح افواج کی قربانیوں کو خراجِ عقیدت پیش کرنے کے جذبے سے لبریز نیا ملی نغمہ "دل سے پاکستان” جاری کر دیا ہے۔

یہ نغمہ بھارت کے خلاف معرکۂ حق میں تاریخی کامیابی کو خراجِ تحسین پیش کرتا ہے اور شہداء کی قربانیوں کو سنہری الفاظ میں سراہتا ہے۔ "دل سے پاکستان” نہ صرف مادرِ وطن کی خودمختاری، بقاء اور سلامتی کے لیے قربانی کے جذبے کی عکاسی کرتا ہے بلکہ قومی اتحاد، ترقی اور استحکام کے عزم کی تجدید بھی ہے۔

نغمے میں افواجِ پاکستان کے ناقابلِ فراموش کردار کو بھرپور انداز میں اجاگر کیا گیا ہے، جو ہر آزمائش میں قوم کے دفاع کے لیے صفِ اول میں رہی ہیں۔

یہ نغمہ قوم کے دلوں میں جوش و ولولہ پیدا کرنے کے ساتھ ساتھ ایک یادگار قومی ترانہ بننے کی مکمل صلاحیت رکھتا ہے، جو موجودہ نسل کو حب الوطنی، قربانی اور اتحاد کا پیغام دیتا ہے۔