بار کی سیاست کو بارز تک محدود رکھا جانا چاہیے تاکہ عدلیہ اور وکلاء کا ادارہ غیر جانبدار تشخص برقرار رہے: وزیرِ قانون

اسلام آباد: وفاقی وزیر قانون و انصاف سینیٹر اعظم نذیر تارڑ سے ملتان ہائی کورٹ بار ایسوسی ایشن سمیت جنوبی پنجاب کی مختلف بار ایسوسی ایشنز کے وفود نے ملاقات کی۔ ملاقات کے دوران وکلاء کی فلاح و بہبود، بار ایسوسی ایشنز کو درپیش مسائل اور ان کے مؤثر حل پر تفصیلی گفتگو کی گئی۔

ملتان ہائی کورٹ بار کے صدر نے وکلاء برادری کے لیے کیے گئے حکومتی اقدامات پر وزیر قانون کا شکریہ ادا کرتے ہوئے کہا کہ وزارت قانون کا کردار قابل تحسین ہے۔ اس موقع پر وفاقی وزیر قانون نے کہا کہ بار کی سیاست کو صرف بارز تک محدود رکھا جانا چاہیے تاکہ عدلیہ اور وکلاء کے ادارے کی غیر جانبدار اور خودمختار حیثیت برقرار رہے۔

انہوں نے واضح کیا کہ وزارت قانون وکلاء کی فلاح و بہبود کو اپنی اولین ترجیح سمجھتی ہے اور ان کے جائز مسائل کے حل کے لیے ہر ممکن تعاون فراہم کرے گی۔ اعظم نذیر تارڑ کا کہنا تھا کہ ای-لائبریری اور سولرائزیشن کے منصوبے حکومت پنجاب کے تعاون سے جاری ہیں جبکہ عدالتوں میں کورٹ فیس سے متعلق دیرینہ مسئلہ وزیر اعلیٰ پنجاب مریم نواز شریف کی خصوصی ہدایت پر حل کر دیا گیا ہے۔

ملاقات میں شجاع آباد، جہانیاں، لودھراں، دنیا پور، ڈیرہ غازی خان، کوٹ ادو، راجن پور، مظفرگڑھ، علی پور، جتوئی، جلال پور، کبیر والا اور بورے والا بارز کے صدور اور نمائندگان نے بھی شرکت کی۔ ان نمائندگان نے اپنے اپنے علاقوں میں وکلاء کو درپیش مسائل سے وزیر قانون کو آگاہ کیا۔ سینیٹر اعظم نذیر تارڑ نے تمام بار نمائندگان کو یقین دلایا کہ ان کے مسائل کو ترجیحی بنیادوں پر حل کیا جائے گا اور وزارت بارز کے ساتھ روابط کو مزید مضبوط بنائے گی۔