عمر ایوب کی عدم پیشی پر نااہلی ریفرنس کی سماعت غیر معینہ مدت تک ملتوی

:اسلام آباد 
پاکستان تحریک انصاف (پی ٹی آئی) کے رہنما اور قومی اسمبلی میں قائدِ حزبِ اختلاف عمر ایوب کی مسلسل عدم پیشی کے باعث الیکشن کمیشن آف پاکستان نے ان کے خلاف دائر نااہلی ریفرنس کی سماعت غیر معینہ مدت تک ملتوی کر دی ہے۔

چیف الیکشن کمشنر کی سربراہی میں پانچ رکنی بنچ نے کیس کی سماعت کی، تاہم عمر ایوب آج بھی پیش نہ ہوئے۔ ان کے جونیئر وکیل نے الیکشن کمیشن کو آگاہ کیا کہ ان کے وکیل پشاور ہائی کورٹ میں مصروف ہیں، اس لیے پیش نہیں ہو سکے، لہٰذا اگلی سماعت کی تاریخ دی جائے۔ چیف الیکشن کمشنر نے ریمارکس دیے کہ نئی تاریخ دے دی جائے، جس کے بعد سماعت غیر معینہ مدت کے لیے مؤخر کر دی گئی۔

واضح رہے کہ 30 مئی کو اسپیکر قومی اسمبلی سردار ایاز صادق نے سابق ایم این اے بابر نواز کی درخواست پر عمر ایوب کے خلاف نااہلی کا ریفرنس الیکشن کمیشن کو بھیجا تھا۔ بابر نواز 2024 کے عام انتخابات میں این اے 18 (ہری پور) سے عمر ایوب سے 82 ہزار ووٹوں کے فرق سے شکست کھا چکے ہیں۔

الیکشن کمیشن نے اس ریفرنس کی ابتدائی سماعت 4 جون کو مقرر کی تھی اور دونوں فریقین کو باقاعدہ نوٹسز بھی جاری کیے گئے تھے، تاہم اپوزیشن لیڈر کی مسلسل غیر حاضری کے باعث کیس التوا کا شکار ہو گیا ہے۔