اسلام آباد میں ٹریفک قوانین کی خلاف ورزیوں پر کریک ڈاؤن

اسلام آباد: (رپورٹ: سید محمد یاسین ہاشمی) اسلام آباد ٹریفک پولیس کی جانب سے ٹریفک قوانین کی خلاف ورزیوں کے خلاف بلاامتیاز کارروائیاں جاری ہیں۔ گزشتہ ہفتے کے دوران 11 ہزار 600 سے زائد گاڑیوں، موٹر سائیکل سواروں، مال بردار اور عوامی نقل و حمل کی گاڑیوں کے خلاف کارروائی عمل میں لائی گئی۔

انسپکٹر جنرل آف پولیس اسلام آباد کی خصوصی ہدایت پر ٹریفک پولیس شہریوں کو ہر ممکن سفری سہولیات فراہم کرنے اور حادثات کی روک تھام کے لیے سرگرم عمل ہے۔ اس دوران خصوصی مہم کے تحت 998 موٹر سائیکل سواروں کو بغیر ہیلمٹ چلانے پر چالان کیا گیا، 2552 گاڑیوں کو غیر قانونی پارکنگ، 808 کو غلط سمت کے استعمال، 1169 کو ٹریفک سگنل کی خلاف ورزی، 114 کو بغیر لائسنس ڈرائیونگ، 821 کو لین قوانین کی خلاف ورزی پر جبکہ 4741 اوورلوڈنگ کرنے والی گاڑیوں کے خلاف قانونی کارروائی کی گئی۔ اس کے علاوہ فٹنس سرٹیفکیٹ نہ ہونے پر 94 ڈرائیورز کے خلاف بھی کارروائی کی گئی۔

وفاقی دارالحکومت میں رکشوں کے داخلے پر پابندی کی خلاف ورزی کرنے پر 207 رکشہ ڈرائیورز کے خلاف کارروائی کی گئی جبکہ ڈرون ٹیکنالوجی کے ذریعے 60 ڈرائیورز کو چالان اور 45 کو آگاہی فراہم کی گئی۔ ایس پی ٹریفک ماجد اقبال نے شہریوں سے اپیل کی کہ وہ دوران ڈرائیونگ قوانین کی پاسداری کریں اور اسلام آباد ٹریفک پولیس سے تعاون کریں تاکہ شہر میں مربوط ٹریفک نظام کو برقرار رکھا جا سکے۔ انہوں نے کہا کہ حادثات کی روک تھام اور قانون کی بالادستی کو یقینی بنانے کے لیے تمام تر اقدامات مساوی بنیادوں پر جاری ہیں۔