عید میلاد النبی ﷺ عقیدت و احترام سے منائی جا رہی ہے، ملک بھر میں چراغاں اور محافل کا انعقاد

لاہور: سرورِ کونین، آقائے دو جہاں حضرت محمد ﷺ کی ولادت باسعادت کا جشن آج ملک بھر میں انتہائی عقیدت و احترام کے ساتھ منایا جا رہا ہے۔ شہروں اور قریوں میں عاشقانِ رسول ﷺ نے پرجوش انداز میں چراغاں کیا، فضا درود و سلام کی صداؤں سے گونج اٹھی، مساجد، عمارتوں، گلیوں اور بازاروں کو دلکش انداز میں سجایا گیا۔ دیپالپور میں مشعل بردار جلوس نکالے گئے جن میں بڑی تعداد میں عاشقانِ رسول ﷺ نے شرکت کی۔

ملک بھر کی مساجد میں میلاد النبی ﷺ کی محافل کا انعقاد ہوا جہاں علما نے سیرت النبی ﷺ پر مفصل خطابات کیے۔ پنجاب اسمبلی کی عمارت کو بھی خوبصورت روشنیوں سے آراستہ کیا گیا جبکہ اسلام آباد میں بین الاقوامی سیرت کانفرنس منعقد ہوگی جس میں صدر آصف علی زرداری اور وزیر اعظم محمد شہباز شریف کی شرکت متوقع ہے۔

عید میلاد النبی ﷺ کے موقع پر سیکیورٹی کے سخت انتظامات کیے گئے ہیں۔ کوئٹہ سمیت بلوچستان کے مختلف علاقوں میں موبائل اور انٹرنیٹ سروس بھی معطل کر دی گئی ہے۔

صدر آصف علی زرداری اور وزیراعظم شہباز شریف نے قوم اور امتِ مسلمہ کو عید میلاد النبی ﷺ کی مبارکباد پیش کرتے ہوئے کہا کہ نبی کریم ﷺ کی حیاتِ طیبہ ایک کامل اور ہمہ جہت اسوہ ہے۔ صدر مملکت نے کہا کہ 12 ربیع الاول اپنی زندگیوں کو تعلیماتِ نبوی ﷺ کے مطابق ڈھالنے کے عہد کا دن ہے۔

وزیراعظم شہباز شریف نے اپنے پیغام میں کہا کہ ہمیں پاکستان کو سیرتِ طیبہ کی عملی تعبیر بنانا ہے اور تعصب، فرقہ واریت، انتہاپسندی اور نفرت کی ہر شکل کو مسترد کرنا ہے۔ انہوں نے مزید کہا کہ ملک میں بھائی چارہ، ایثار اور اتحاد کو فروغ دینا ہوگا کیونکہ قومی مسائل کا پائیدار حل نبی اکرم ﷺ کی تعلیمات کو قومی کردار کا حصہ بنانے میں ہے۔