بارانی زرعی یونیورسٹی کے سب کیمپس اٹک میں نئے طلباء کے لیے اورینٹیشن سیشنز کا انعقاد

پیر مہر علی شاہ بارانی زرعی یونیورسٹی راولپنڈی نے سب کیمپس اٹک میں داخلہ لینے والے نئے طلباء کو خوش آمدید کہتے ہوئے ان کے لیے خصوصی اورینٹیشن سیشنز کا انعقاد کیا۔ اس سیشنز کا مقصد طلباء کو یونیورسٹی کے قواعد و ضوابط، تعلیمی پروگرامز اور کیمپس کے متعلق آگاہی فراہم کرنا تھا۔ سیشنز میں وائس چانسلر پروفیسر ڈاکٹر قمر الزمان نے رجسٹرار، ڈینز، ڈائریکٹرز اور پرنسپل آفیسرز کے ہمراہ شرکت کی۔

وائس چانسلر پروفیسر ڈاکٹر قمر الزمان نے خطاب کرتے ہوئے کہا کہ ہم پاکستان کی صفِ اول کی یونیورسٹی میں آپ سب طلباء کو خوش آمدید کہتے ہیں۔ ہمارا مقصد آپ کے تعلیمی جذبے کو مزید بڑھانا اور ایک ایسا ماحول فراہم کرنا ہے جو آپ کو ترقی اور جدت کی طرف مائل کر سکے۔ اس موقع پر انھوں نے یونیورسٹی کے چانسلر گورنر پنجاب، حکومتِ پنجاب اور ضلعی انتظامیہ اٹک کے بھرپور تعاون پر ان کا شکریہ بھی ادا کیا۔ انھوں نے مزید کہا کہ بارانی زرعی یونیورسٹی راولپنڈی طلباء کی مکمل تعلیمی معاونت کے لیے پُرعزم ہے اور انھیں جدید ترین سہولیات فراہم کر رہی ہے تاکہ طلباء ترقی کی راہ پر گامزن ہو کر اپنے خوابوں کی تعبیر حاصل کر سکیں۔ وائس چانسلر نے تمام شعبوں میں تعلیمی معیار کی بہتری کے حوالے سے بات کرتے ہوئے کہا کہ یونیورسٹی میں جدید او بی ای سسٹم کے تحت بین الاقوامی معیار کی تعلیم دی جا رہی ہے۔

سیشن کے دوران رجسٹرار، ڈینز، ڈائریکٹرز اور پرنسپل آفیسرز نے طلباء کو مزید معلومات فراہم کرتے ہوئے انھیں یونیورسٹی کے قواعد و ضوابط، پالیسیوں اور دیگر اہم امور کے متعلق بھی آگاہی فراہم کی۔ انھوں نے بتایا کہ تمام فیکلٹیز اور انسٹی ٹیوٹس میں طلباء کی بہتر رہنمائی کے لیے معلوماتی ڈیسک بھی قائم کیے گئے ہیں جہاں انتظامی عملہ ہمہ وقت موجود رہتا ہے اور طلباء کو بہترین رہنمائی فراہم کر رہا ہے۔

مقامی کمیونٹی کی جانب سے بھی یونیورسٹی کے اس اقدام کو خوب سراہا گیا اور ان کا کہنا تھا اس کیمپس کے سبب طلباء کو اعلیٰ تعلیم کے دور دراز کا سفر نہیں کرنا پڑے گا۔