ڈیرہ اسماعیل خان اور ٹانک میں دشمنی کے دو واقعات، فائرنگ سے 6 افراد قتل

ڈی آئی خان، ٹانک:خیبرپختونخوا کے اضلاع ڈیرہ اسماعیل خان اور ٹانک میں دیرینہ دشمنیوں نے ایک بار پھر انسانی جانوں کا خراج لے لیا، فائرنگ کے دو مختلف واقعات میں 6 افراد قتل کر دیے گئے۔

ڈیرہ اسماعیل خان کی تحصیل پہاڑپور کے علاقے رحمانی خیل میں دو مخالف گروپوں کے درمیان رات تین بجے کے قریب شدید فائرنگ کا تبادلہ ہوا، جو دیرینہ دشمنی کا نتیجہ تھا۔ اس واقعے میں ایک گروپ کے تین افراد — نعمت اللہ، محمد سلیم اور زاہد — موقع پر جاں بحق ہو گئے۔ فائرنگ تھانہ پنیالہ کی حدود میں ہوئی، پولیس نے فوری طور پر موقع پر پہنچ کر علاقے کو گھیرے میں لے لیا، سیکیورٹی سخت کر دی گئی، اور مقدمہ درج کر کے تفتیش کا آغاز کر دیا گیا ہے۔

دوسری جانب ضلع ٹانک کے گاؤں ملازئی میں بھی مسلح افراد نے گھر میں گھس کر اندھا دھند فائرنگ کی، جس کے نتیجے میں دو بھائیوں سمیت تین افراد جاں بحق ہو گئے۔ مرنے والوں میں سردار احمد، اعزاز احمد (پسران گل احمد) اور ان کے دوست عمران (ولد گل بادشاہ) شامل ہیں۔ پولیس کے مطابق یہ واقعہ بھی علاقائی دشمنی کا شاخسانہ ہے۔

دونوں واقعات کی چھان بین جاری ہے اور پولیس حکام کا کہنا ہے کہ ملوث عناصر کے خلاف قانون کے مطابق سخت کارروائی عمل میں لائی جائے گی۔