پی ٹی آئی چھوڑ کر ساجد قریشی ساتھیوں سمیت پیپلز پارٹی میں شامل

راولپنڈی : پاکستان تحریک انصاف کے مرکزی ڈپٹی انفارمیشن سیکرٹری ساجد علی قریشی نے گورنر پنجاب سردار سلیم حیدر سے ملاقات کے دوران پیپلز پارٹی میں شمولیت کا اعلان کر دیا۔ ساجد قریشی نے اس موقع پر کہا کہ تحریک انصاف کی منفی اور احتجاجی سیاست سے دل برداشتہ ہو کر وہ اپنے اصل سیاسی گھر، پیپلز پارٹی میں واپس آ گئے ہیں۔

انہوں نے بتایا کہ ان کے ساتھ تحریک انصاف کے متعدد عہدیداران بھی پاکستان پیپلز پارٹی میں شامل ہو رہے ہیں، جن میں علی رضا، امجد جاوید، جہانگیر خان، حمزہ گل زرین، بدر ستی، راجہ تنویر، راجہ خالد، راجہ حنیف، سردار ندیم، عادل تاج، حمید عباسی، بابر محمود، ڈاکٹر شکیل مغل، جاوید اقبال اور دیگر شامل ہیں۔ ساجد قریشی نے اس شمولیت کا سہرا پیپلز پارٹی سٹی کے صدر راجہ کامران کے سر باندھتے ہوئے کہا کہ ان کی کوششوں اور قیادت میں وہ تمام ساتھیوں کے ہمراہ راولپنڈی سے گورنر ہاؤس اسلام آباد آئے۔

گورنر پنجاب سردار سلیم حیدر نے ساجد قریشی اور ان کے ساتھیوں کو خوش آمدید کہتے ہوئے ان کی پیپلز پارٹی میں شمولیت کو خوش آئند قرار دیا اور انہیں پیپلز پارٹی کے پرچم کا مفلر پہنایا۔ انہوں نے کہا کہ ساجد قریشی جیسے نظریاتی کارکنوں کی شمولیت سے پیپلز پارٹی راولپنڈی میں مزید مضبوط ہو گی۔ ان کا کہنا تھا کہ پیپلز پارٹی ایک قومی سیاسی قوت ہے اور آئندہ وزیراعظم بلاول بھٹو زرداری ہی ہوں گے۔

اس موقع پر پیپلز پارٹی سٹی کے صدر راجہ کامران نے کہا کہ ساجد قریشی ایک محنتی اور متحرک رہنما ہیں اور ان کی واپسی سے پارٹی میں نئی توانائی پیدا ہو گی۔ تقریب میں پیپلز پارٹی سٹی کے دیگر قائدین، جن میں اسد پرویز، راجہ عامر کریم، چوہدری ظفر منیر، سردار قدوس، راجہ عرفان حیدر، توصیف بٹ اور دیگر شامل تھے، بھی شریک ہوئے اور شمولیت اختیار کرنے والے تمام رہنماؤں کو خوش آمدید کہا۔