چیف ٹریفک آفیسر فرحان اسلم نے راولپنڈی میں چارج سنبھال لیا

راولپنڈی :(سید محمد یاسین ہاشمی)
چیف ٹریفک آفیسر راولپنڈی فرحان اسلم نے باضابطہ طور پر اپنے عہدے کا چارج سنبھال لیا۔ ٹریفک ہیڈکوارٹرز ریس کورس پہنچنے پر انہیں ٹریفک پولیس کے چاک و چوبند دستے نے سلامی پیش کی اور پھولوں کا گلدستہ دیا گیا۔ اس موقع پر سی ٹی او نے تمام برانچ انچارجز سے فرداً فرداً ملاقات کی اور ہیڈکوارٹرز کی مختلف برانچز کا تفصیلی دورہ کیا۔

فرحان اسلم نے شہریوں کو فراہم کی جانے والی سہولیات کا جائزہ لیتے ہوئے ہدایت کی کہ ٹریفک وارڈنز اور اسٹاف عوام کے ساتھ خوش اخلاقی اور پیشہ ورانہ رویہ اپنائیں۔ انہوں نے خاص طور پر خواتین، بزرگ شہریوں اور ٹرانسجینڈرز کے ساتھ عزت و احترام کو یقینی بنانے پر زور دیا۔ سی ٹی او نے لائسنس کے اجرا کے تمام مراحل میں شفافیت اور میرٹ کی مکمل پاسداری کی ہدایت بھی جاری کی۔

انہوں نے کہا کہ ٹریفک پولیس ایک ڈسپلن فورس ہے جس کا فرض ہے کہ قانون کی مکمل عملداری، روڈ سیفٹی اور حادثات میں کمی کو یقینی بنائے۔ انچارج ایجوکیشن ونگ کو ہدایت کی گئی کہ شہریوں میں ٹریفک قوانین سے متعلق آگاہی مہم کو مزید مؤثر بنایا جائے، جبکہ انچارج ڈرائیونگ اسکول کو "ویمن آن ویلز” پروگرام کے دائرہ کار کو وسعت دینے کی ہدایت دی گئی۔

سی ٹی او فرحان اسلم نے سرکل افسران کو تجاوزات اور غلط پارکنگ کے خلاف مؤثر کارروائی یقینی بنانے کی ہدایت کرتے ہوئے کہا کہ شہر میں ٹریفک کی روانی ہر حال میں برقرار رکھی جائے۔ انہوں نے عوام سے اپیل کی کہ وہ ٹریفک قوانین کی مکمل پابندی کریں اور مہذب شہری ہونے کا ثبوت دیں۔

اختتام پر انہوں نے اس عزم کا اعادہ کیا کہ راولپنڈی ٹریفک پولیس کو پنجاب کی مثالی فورس بنانے کے لیے ہر ممکن اقدامات کیے جائیں گے اور شہریوں کی سہولت اور سڑکوں پر بلا تعطل ٹریفک روانی ہماری اولین ترجیح ہو گی۔