اسلام آباد میں معرکہ حق اور یوم آزادی کی شاندار تقریبات کی تیاریوں کا آغاز

اسلام آباد: چیئرمین سی ڈی اے اور چیف کمشنر اسلام آباد محمد علی رندھاوا کی زیر صدارت سی ڈی اے ہیڈکوارٹرز میں اجلاس منعقد ہوا، جس میں ممبر ایڈمن و سٹیٹ طلعت محمود، ممبر پلاننگ خالد حفیظ، ممبر فنانس طاہر نعیم، انسپکٹر جنرل پولیس اسلام آباد سید علی ناصر رضوی، ڈپٹی کمشنر اسلام آباد عرفان نواز میمن سمیت دیگر سینئر افسران نے شرکت کی۔

ہفتہ کو جاری سی ڈی اے کے بیان کے مطابق، وفاقی وزیر داخلہ محسن نقوی کی ہدایت پر اجلاس میں معرکہ حق اور یوم آزادی کی تقریبات کو شایانِ شان طریقے سے منانے کے لیے کیے جانے والے انتظامات کا جائزہ لیا گیا۔ فیصلہ کیا گیا کہ شہر کی اہم شاہراہوں، بشمول شاہراہ دستور، کلب روڈ، سری نگر ہائی وے اور جناح ایونیو کو خوبصورت لائٹنگ، ڈیجیٹل سٹریمرز اور ایل ای ڈیز سے سجایا جائے گا، جبکہ تمام عمارات پر قومی پرچم اور چراغاں کا اہتمام کیا جائے گا۔

چیئرمین سی ڈی اے نے بتایا کہ تقریبات میں پرچم کشائی، شاہراہوں کی رنگین برقی قمقموں سے سجاوٹ، ثقافتی پروگرام، آتش بازی، ملی نغموں کے مقابلے، تقریری و پینٹنگ مقابلے، ٹیبلو شوز اور عوامی تقاریب شامل ہوں گی۔ اسلام آباد کے تمام پارکس اور گراؤنڈز کو بھی خصوصی روشنیوں سے آراستہ کیا جائے گا، جبکہ شہر میں چلنے والی بسوں پر معرکہ حق اور یوم آزادی کی برانڈنگ کی جائے گی۔

سکیورٹی کے لیے اسلام آباد پولیس کو فول پروف اقدامات کرنے کی ہدایت دی گئی ہے، جس میں داخلی و خارجی راستوں پر چیکنگ، اہم مقامات پر سی سی ٹی وی نگرانی اور خصوصی سکیورٹی ٹیموں کی تعیناتی شامل ہے۔

محمد علی رندھاوا نے کہا کہ معرکہ حق نہ صرف ہماری بہادر افواج کو خراجِ تحسین پیش کرنے کا موقع ہے بلکہ یہ اس عزم کی علامت بھی ہے کہ پاکستانی قوم ہر مشکل گھڑی میں اپنی مسلح افواج کے ساتھ شانہ بشانہ کھڑی ہے اور دشمن کے ناپاک عزائم کو ناکام بنانے کے لیے متحد ہے۔